【小編的話】
[個人感想] 好就要讚、爛就要鬧 – May’n香港演唱會個人短感
註：以下只是其中一位小編的個人感受，與本站立場並無關係。
[口語mode注意] 尋晚係大家等左好耐May’n部長既香港演唱會大日子。如此盛事AniSong Headline既小編們又點會唔乖乖買飛棒場呢。May’n果然係魅力沒發擋，雖然MACROSS F動畫版已經播完若干年日，電影版又冇係香港上過，但憑May’n本身既實力同人氣，無論電影定新番主題曲都一樣令人容易中毒！
尋晚非常多謝在場歌迷主動過來拎我地既freepaper呢~老實講我地本身都冇預到反應會咁好，或者多得May’n Asia既官方Facebook上面既宣傳話我地係Hong Kong anisong newsletter吧~星期六見到果時都有D受寵若驚。然後唔知大家尋晚有冇被一個「文化放送」既日本人訪問呢？尋晚我地有兩個編輯同呢位朋友傾得幾投契，又識到日本既Fans做朋友，講真真係因為anisong全球化先至有呢D機會！
先讚後彈，開場前郭X安出來講到明收相機收手機嚴禁偷拍。好！非常好！咁多年以來非常不爽D人一路睇一路偷拍，唔尊重歌手之餘又阻住周圍。呢個事前聲明我非常欣賞！而且好似場入面多左著全套黑色西裝既staff係度捉偷拍咁，老老實實，我非常讚成呢個安排！
開場前有See☆A出場都估到，因為之前有人去左廣州站都係咁。反而係Lantis張聲優audition單張比較有D嚇親lol 4個女仔出來果下當係Live前熱身算係咁囉，練定PPPH，又可以試下附近既人究竟係齋坐/睇定會投去call。點知佢地唱第一首歌，音響一聽就出事。
好就要讚、爛就要鬧
今次真係我睇左近2年以來咁多場香港搞既anisong live音響最差既一次！
08年開始：JAM Project第一場，下川美娜、水木大哥同Micchi、米倉石川、Kalafina、SCANDAL、第一次May’n、影山遠藤、兩次福山芳樹單拖、Suara、JAM Project連BAND、中島愛、桃井晴子、GEN G高達Live、美鄉あき、ELISA飛蘭、玉置成實、3年既漫節、C3…咁多場我都在場，今次係我第一次打打下Call要停低用手掩耳！
即係咁，我自己唔算好精音響野，唔似得某D精通音響既朋友咁識用好technical既角度分析音質，但都叫做有一對健全既耳字去聽乜叫好音樂乜野叫嗓音糟蹋歌手既靚聲。See☆A一開始果首歌已經聽得出「今次大鑊啦」咁樣。唔好講佢地係新人，唱既係新歌，而係我根本真係聽唔到佢地唱緊乜野歌詞！如果唔係音響問題令我聽唔到佢地唱乜，就係原來我之前訪問ELISA呀同埋同文化放送既Staff吹水時既日文程度插水式退步令我聽唔到佢地唱乜。
我唔識好仔細咁分析D音響野比大家聽真係唔好意思，作為一個坐係後方既觀眾，我聽到既只係：
1. May’n既低音演繹完全被爆發出來既音樂遮到聽唔到唱緊乜。Bass係好勁呀，我就咁企響度都feel到我條褲係度震緊，勁到呢。Bass勁唔係問題，問題係音響遮左人聲囉，live band就話je，播CD既話我相信大家想聽到人聲多過音樂掛？
2. May’n既長而具撕裂性既高音係呢個音響setting底下，完全變成刺耳！May’n既所謂「哎」位，全部都聽得好辛苦好刺耳。我唔係想講部長表現唔好，部長表現得好好，教大家玩ナンバーワン！果時仲好萌好可愛tim，美腿仍然是美腿，但呢套音響完全將部長呢種睇唔見盡頭既聲線完美轉化成刺耳既噪音！我當場真係聽到火火地，根本係度浪費緊May’n既歌唱實力！聽左三首歌就耳鳴啦，想點先！
坊間都開始有唔同既論壇有朋友對今次演唱會既音響表現強烈不滿。老老實實，我都算係呢間搞Live公司既長期Fans，但聽過咁多場既自己，我相信我有少少資格來彈今次既音響掛。邊間公司都好，做得好既我會讚，做得差既，「強差人意，希望將來有更大進步」呢D字眼我都會照講，絕不含糊。
歌手有料，大家有愛，但中間既器材同協調做得差，大家都係一樣聽唔到，歌手亦都表達唔到，何苦呢？民怨四起啦，希望主辦會係呢方面有D交代啦sosad。
